أنا عارفة ان احنا في نص ليل و الوقت غريب و اختي جنبي بتذاكر و هتقتلني من صوت ال typing بس لازم اكتب ده دلوقتي :)
ساعات كتير في دوامة الحياة و المشاكل و القرف ده بننسى نعم كتير أوي ربنا سبحانه و تعالى أنعم علينا بيها :) و ساعات كتير بنحزن على النعم دي!
ساعات كتير بنقول "ليه يا رب كدة" على حاجات و ثوابت لقينا نفسنا مخلوقين بيها, و نبقى فاكرينها حاجة وحشة أو أذى و نقمة و هي في الحقيقة أكبر نعمة :)
مش هقول على حد بس هاتكلم عن حاجة حصلت معايا .. ساعات كتييييييير بتضايق ان امي مش زي أمهات صحابي كتير .. مش من الناس الفري و السلسين يعني
و جو النوادي بقى و كدة .. و من زمان و هي مخنقة على حوار التلفزيون و السينما و شوية شوية أعياد الميلاد و اللبس و كل حاجة تطبق السنة بحذافيرها
على الرغم ان أصلا زمان ماكانوش كدة .. و الدين ماكانش بالقوة دي و الناس وعيها ضعيف .. و كنت بافضل أقولها يا ماما طيب براحة علينا
و كل ماتقولي حاجة أقولها .. يعني انتي كنتي بتعملي كدة؟! تقول لي احمدي ربنا انك لاقية حد يوجهك للصح و عارف .. زمان ماحدش كان يعرف زي دلوقتي
بس بقى .. فالمهم إن كتير كنت بابقى متضايقة إن أمي مش متساهلة في حاجات يعني زي أمهات كتير .. و مع الوقت (لما كبرت كدة و عقلت .. قال يعني)..
عرفت قد إيه هي نعمة :) إن يكون حد من أهلك بيوجهك للصح دايما .. حتى و ان تشدد معاك شوية .. فمسيرك في يوم تفهم .. إن التقويم ما هو إلا نعمة :)
و إن تلاقي حد بيوجهك دايما لإتباع السنة بعيدا عن كل المذاهب و اللخبطة اللي في أيامنا دي .. و إن يبقى حد من أهلك أصر يتعلم أصول الدين
حتى و رغم اعتراض ناس كتير انت منهم, على أساس إن الكتب موجودة و كلنا عارفين السنة (اللي هي قشور طبعا) و تبقى مش شايف أي فايدة إضافية ليك..
بجد هي نعمة, و في يوم زي انهاردة و قبل كدة من مدة .. باكتشف ان هي نعمة من ربي إن تكون أمي دارسة علوم شرعية و تعلمني ما تستطيع منها :)
و تساعدني أفهم مين بيقول ايه و ليه و الآراء و المذاهب و اجتناب كثير من الفتن بسبب الدراسة الصحيحة :) .. فـ الحمد لله ألف حمد و شكر على نعمه
و يا رب يخليكي ليا يا أمي يا نعمة و فضل من ربي :) ♥ ♥
