*106* نفسك بوجهيها

نفسك (الفطرية) وشيطانك (نفسك الأمّارة بالسوء) .. وجهان لعملة واحدة "أنت" 

إن صَلُحَت الأولى فستقودك للارتقاء الربّاني, حيث الرؤية الصحيحة لماهية الحياة, حيث التجرَّد من التفاصيل والدوامات الغاشية والتنَّعُم بحياة تنتظرنا في الأفُق .. حيث السلام والطمأنينة .. حيث الوُد الصحيح .. وُد لكل المخلوقات .. ورؤية جوهر الجمال المكنون بها .. والتماس الضياء الربّاني بكل ما تحمله في طيّاتها ..

و إن استقوت الأخرى فستشدك لدنية الدنيا بجُل معتقداتها, بعبثها وصخبها, بشقائها والتعلُّق بكل زائل فيها, ستفضي عليك البأس والحزَن والسخط, ستغشيك بالتعاسة والهروب الدائم, ستملؤك بالشحناء والبغضاء كلما سار أمر عكس هواك, ستمحي من ذهنك جوهر الكون وأسبابه, ستُعظِّم كل هيّن وتهوِّن كل عظيم ..

ووقت الشدائد تتنازع هاتين .. تارة ترى البشر و تارة تجوب في سخط .. تارة تعفو و تارة تؤلِم .. لا تفهم تقلباتك, ولكنّه الصراع الداخلي ..وبيدك انهائه .. بيدك اللجوء لمالك القلوب ومقلبها .. فسبحانه بيده نصرة الحق بداخلك .. بيده وحده

"يارب .. إن صح منك الوُد فالكل هيّن .. وكل الذي فوق التراب تراب"

*18* بتعرف تضحك على نفسك؟ زيي؟! :D

من الحاجات اللي بتسعدني إني ساعات بعرف أضحك على نفسي D: 

--

كنت بقالي كتير عايزة آخد قرار إني أصوم اتنين و خميس و الـ 3 أيام من كل شهر عربي, و قلت إن شاء الله من بعد رمضان اللي فات هصومهم. 

و كل سنة أقول "خلاص بقى الصيام ما باقاش بيتعبني و أهو إحنا بقينا آخر رمضان و إن شاء الله أستمر و مش هتعب"

 و يجيي رمضان يخلص و أصوم الستة البيض و .... هسسسس ألاقيني كسلت! و أقول بكرة .. طيب الخميس الجاي .. و هكذا...!

السنة دي بقى, مش زي كل سنة! شحنت نفسي كدة و أعدت أقول يلا و هبدأ و فعلا الحمد لله بدأت أصوم, والحمد لله برده استمريت لفترة و فرحت إني مكملة...

بس إزاي؟! إزاي كدة نفسي تسيبني أعمل اللي أنا عايزاه من غير ماتناكفني ؟

فلاقيت نفسي كل شوية تسيبني تسيبني و تيجي ليلة الإتنين و لّا ليلة الخميس و تقول لي:  "ما جاتش يعني على بكرة, ما إنتي أهو ما شاء الله مستمرة, افكسي بكرة ده انتي عندك كلية طول النهار! و لو صومتي يبقى أكيد هتفطري في الشارع, و مش بعيد ما تفطريش أصلا لحد بعد العشاء"

و مرة تانية تيجي تقول لي:  "يــــوه ده بكرة أجازة! يعني طول النهار في البيت, و مش هتلاقي حاجة تشغلك و تنسيكي الأكل و هتفضلي طول النهار داخلة طالعة على المطبخ و هتزهقي"

و مرة غير المرتين دول بقى تتفق مع "نَفس" ماما عليا و ألاقي ماما جت تقول لي "بلاش بكرة يا بنتي ده يوم إمتحان و إنتي مش ناقصة تتعبي, مش كفاية مابتاكليش, ما جاتش على بكرة"

و أصعب مرة بقى لما أكون فعلا تعبانة و تيجي توزني ليلتها "يا بنتي انتي قادرة تركزي و لا تشيلي نفسك, ريحي بكرة عشان تعرفي تشوفي اللي وراكي و تفوقي بقى!"

أكيد طبعا أنا مش هقعد كدة ساكتة, لازم أرد يعني, لاماضة بقى تقولوا ايه!

فلما نفسي تيجي تقول لي زي أول مرة هنا, أروح أنا رده عليها و قايلالها "ما هو أنا يا ناصحة بصوم اليوم اللي عندي فيه كلية عشان أتلخم و ماخدش بالي و لما أروح البيت بقى آكل الأكل السليم بدل أكل الشارع و البسكوتات و الشيبسي و الكلام اللي بيتخن ده و مايفدش"

و لما تيجي في تاني مرة أروح خابطاها الرد ده بقى "إنتي مجنونة؟ عايزاني أضيع يوم زي ده؟ يعني يوم لا هاروح و لا آجي فيه, و لا مواصلات و لا بهدلة  ولا دوشة شارع و كلية و لا دكتور يقعد يشرح بالتلات أربع ساعات و دماغي تصدع. لأ طبعا هصوم إن شاء الله. و بعدين من كتر ما أنا باكل أوي في الأيام العادية و بسمع الكلام و باكل التلات وجبات يعني؟!!"

و في المرة التالتة بقى بقوم مسكتاها و أقول لها "يا بنتي, ماهو أنا هاصوم بقى عشان ربنا يكرمني في الإمتحان, مش من كتر ما أنا ضامنة أوي إني أقفله, و بعدين أهو لو تعبت هبقى أفطر" و آخر جملة دي برده اللي بقولها لماما "لو تعبت هبقى أفطر" و دي برده اللي برد بيها على نفسي في آخر حالة ..

 ما هو أصل ده اللي بيفرحني!

 إني بضحك على نفسي D:  قال ايه بسكتها يعني, رغم إن نص الحجج و الأسباب دي أصلا مش الأسباب اللي أنا بصوم عشانها, بس أنا لو قلتلها نيتي فعلا هلاقيها اتعفرتت أكتر و ناكفتني بقى و هتصدعني و مش هتسيبني في حالي. فأنا بضحك عليها, و أنا عارفة أصلا إني لو صبحت صايمة هستخصر إني أفطر! قال أفطر قال! و أضيع ثواب يوم كامل؟ يوم لله؟ يوم قال فيه رسول الله (صلى الله عليه و سلم):

 (من صام يوما في سبيل الله، بعد الله وجهه عن النار سبعين خريفا). رواه البخاري ومسلم

عرفتوا بقى أنا ليه فرحانة :) طيب بذمتكوا بتعرفوا تضحكوا على نفسكوا زيي؟ P: :)