نفسي أكتب.. لكن الوطن بيتألم .. و ليه أكتب و لمين أكتب .. و كله شكله بيستسلم و لا لله يسلِّم ..
نفسي أكتب كلام كتير .. بس الكلام خاصم القلم .. أصله شاف الظلم بيتقابل بصم و بكم .. و لا أكنهم عجم .. و لا أكن الوطن يِهِم
نفسي أكتب و أقول مواويل .. ده القلب ياما سهر في ليل طويل .. و يوم ما قالوا له يلا إفراج .. لقى الحمام هج من الأبراج
وقف أسير مكانه و الزمن ساعته اتعطلت
مابقاش عارف يرجع و لا يتقدم .. هي الدنيا ليه فجأة غيمت؟
سأل نفسه و مين يجاوب؟ .. ده كله تايه جوه نفسه
لا حد شايف و لا حد سامع غير صدى صوت آخدته لنَفَسه.. و هس.. بس.. اوعى تعلّي الحس..
لا حد يفوق من ثباته و دوامة النفس!
هش .. خليك في حالك.. جوه بيتك متغطي.. و يا ريت كمان تغمي
البعبع صِحي
فاق و فجر و لا ناوي يستحي
هش .. وطي الحس
لا يسمعوا نفسك و ياخدوك ورا الشمس
هس .. بس
انت مين عشان تحاول تفك الترس؟
ترس ظلم على ترس قمع على ترس فقر على ترس نهب
عايز تفك التروس ! إنت ايه يا أخي مَدَب!
اتقل كدة و عيش و روق .. بكرة الرشوة تيشيل ما تفوّق
بكرة كله هيضحك بس الصبر
اصبر على القهر لحد ما يودوك القبر
بس .. بقولك ايه
ما تبقاش تندم و تقول إني قولتلك.. آه .. اللي أوله ظلم أخره فجور!
و أنا بس قلت..
أما إنت .. فبكرة هيجي عليك الدور!
No comments:
Post a Comment