المشهد:
شوية بنات على سيدات متجمعين و قاعدين في شبه دايرة أو ساعات شبه مستطيل, شوية قاعدين على الأرض و شوية على كراسي .. في ســـكـــون
هي عندها معرفة (أو عِلم) في حاجة فبتبتسم و تبص في وشوش اللي قاعدين وتبدأ تحكي حكاية توصل بيها المعرفة دي
وبعدين أنظار اللي قاعدين تتحول من "هي" لـ "هي" لما هي الأخيرة تبدأ تحكي في جزء تاني بمعرفة تانية
و لما تبص على وشوش اللي قاعدين و سكينتهم وتركيزهم تحس كدة بـ (شهيق .. زفير .. فيه راحة وجمال مع ابتسامة مش مفرقاك :) )
أصل اللي بيتقال مش أي كلام والسلام .. و الأسلوب مش كلمتين على الطاير .. و اللي قاعدين محدش جابرهم يحضروا .. و اللي بيتكلموا مش مدفوع لهم فلوس عشان يتكلموا :)
أصلها قاعدة لله .. قاعدة ذكر .. بيسموها "حلقة" .. بيقعدوها شوية ناس في مسجد أو بيت ..
بيقراوا شوية قرآن و يعرفوا كام حُكم تجويد بسيط في كل مرة .. و بعدين يطرحوا موضوع و يشوفوا أحاديث بتتكلم عنه و إيه الحكايات اللي كانت متعلقة بالموضوع ده أيام الرسول (صلى الله عليه وسلم) و الصحابى (رضوان الله عليهم) :)
ناس مش مستعجلة عل دنيا .. بس بيحرصوا على "التذكِرة" عشان الدنيا ماتنسيهومش أصل وجودهم على هذا الكوكب العجيب :)
ناس مفيش بينهم مصالح, و بالتالي لا رياء ولا نفاق ولا غيبة ولا نميمة ولا كدب ولا غش ولا (نفسنة) ولا ظن سيء ولا.... ولا أي حاجة من الحاجات اللي بتنكد على الواحد وتبوظ "نفسه" و تتوهها في متاهات الدنيا
ناس بتحب بعض .. لله
ناس بتشجع بعض .. لله
ناس بتبتسم في وشك و تيجي تسلم عليك وتاخدك بالحضن وانت أصلا تبقى أول مرة تشوفهم في حياتك .. لله :)
أصلهم عملواب الحديث اللي بيقول:
قال رسول الله صلى الله عليه وسلم
(لا يقعد قوم يذكرون الله إلا حفتهم الملائكة وغشيتهم الرحمة ونزلت عليهم السكينة وذكرهم الله فيمن عنده)
في جمال كدة؟ :)
ياريت كل تجمعاتنا فيها ولو 10 دقايق كدة ذِكر :) والله هتفرق كتير :))
يارب كتر حلقاتنا واطرح فيها البركة وزيد :))
No comments:
Post a Comment