ساعات كتير بنبقى عايزين نكتب, نحكي, نقول حاجات كتير جوانا.. بس.. أول ما نيجي نبدأ, أو ساعات حتى قبل ما ناخد خطوة البدء, بنرجع ميت خطوة لورا.. و نلاقي حماسة اللحظة اختفت و كله سِكِت ..و ان عِلِي صوت تقوله هُس!
--
ساعات بنبقى عايزيين نكتب عن إحساس معين نتج عن حادث معين بس بسرعة نلاقيه اختفى..
بيجري يهرب مننا و ياخد معاه كل الكلام و كل الدفى..
و ساعتها بنرجع لورا و نقول..
أصل ما فيش كلام يتقال..
أصل ما فيش حاجة في دماغي بتدور .. غير عنوان ..
و شوية كلام متفرط لو اتحط في جملة يقولوا مسطول اللي كتبه أكيد .. مجنون .. أو بني آدم غلبان ..
ما هو أصل مش كل اللي يتحس يتقال .. و لا كل إجابة كان لها سؤال .. و لا عُمر سحر الحروف تغني .. و لا عُمر كُتر السطور تخفي ..
لو قررت نبضة قلب تضفي .. شوية حيرة على حبة كتمان
و أنام أنا و أصحى .. و اشتاق للحروف .. اصلها زي الصور .. تتاخد مع الضيوف .. و أنا احاسيسي ضيوف .. تيجي مع الظروف .. ألحقها ما الحقها .. كلها بتبقى صور .. تتعلق عل رفوف
و أرجع بعد كتير .. أقلِّب في الصور .. أحن ساعات كتير لأيام الصِغَر .. و أجري جري أنا بين ضيوفي الجداد .. عملنا ايه بالصور .. ما هو كل اللي فات مات .. آه و الله .. كل اللي فات مات .. و الصور عل رفوف .. واقفة من سُكات .. و أفضل أنا أتوه .. جوه الذكريات
No comments:
Post a Comment