بم إنه عيد اللحمة و كدة .. افتكرت حاجة و ماما بتحط الأكل ..
 |
| تمام كما كان المشهد خارج المخيم في منى |
كنا في الحج من 4 سنين كدة .. كان فيه حاجتين ضايقوني
أول حاجة إننا مصليناش العيد :( قالك الحجاج عيدهم عرفة .. !! اضطريت أعديهالهم D:
بس اللي معديتوش بقى كان موضوع الأكل! :)
كنا طالعين تبع مُطوف سعودي (من السعودية يعني مش من مصر), فـ في حتة الأكل دي كنا متظبطين جدا من حيث الطهي و الكميات
بس اللي ضايقني بقى إن الأكل كان بينزل في صنية كبيرة كدة زي بتاعة الفلاحين دي (الصنية اللي تقضي 10 أنفار), مش مشكلة الصنية إنها فلاحين D: مشكلة إن الناس تمد اديها و تنقنق و الصنية ترجع زي ما هي!
صنية رز و لحم (كل وجبة على مدار المدة الي قعدناها في مِنى) ترجع شبه كاملة!!
طيب ترجع إزاي؟ ترجع في الزبالة طبعا! آه الصواني (على مستوى الخيمة بقى, و رجال و سيدات) كل وجبة تفضل زي ماهي و تترمي في الزبالة!
و برة المخيم بالظبط كان ناس من جميع الجنسيات جايين بالعافية و مش لاقيين أكل!
الموضوع كان مرعب فعلا, اللي هو إحنا بنستحرم رزاية تفضل في الطبق!
المهم عقبال ما قدرنا نقنعهم إن ده اسمه "افتراء" و "حرام" و إن الأكل اللي ماتمسش ده نحطه في علب و نوزعه على بقية الناس اللي مش لاقية تاكل (و ما أكثرهم في الحج) كان اترمى كميات في الزبالة تأكل حي بحاله!
--
ليه بقول كدة دلوقتي, عشان ده كان مثال حي على اللي بيحصل في االعالم, كلنا بشر .. على نفس الأرض, بلاد جيران, و رغم كدة ناس تاكل و ترمي و ناس مش لاقية اللقمة!
عشان كتير بننسى إن اللي بنتقمر عليه ده ناس بتحلم تشوفه بس, مش كمان تملكه!
عشان نحمد ربنا إن أهلنا مربينا على الإعتدال و الإحساس بالغير, لإن النعم دي مابنحسش بقيمتها غير لما نشوف ناس مفتقداها تماما و في جهل تام إنهم فاقدنها!
و عشان ماننساش غيرنا في أيام مباركة زي دي, و مايكونش العيد "علينا" بدل ما يكون "لنا"
و ربنا يرحمنا و يهدينا جميعا .. و كل لحمة و إنتوا طيبين : )
.jpg)
No comments:
Post a Comment