نادرا ما كلام يشدني و أعمله copy & paste .. بس لما قرأت الكلام ده على page مسني أوي
"عندما تعجبنا الروح ..
تُعجبنا الملامح حتى و لو لم تكن جميلة .. "))♥
كرتي البعبع"
تُعجبنا الملامح حتى و لو لم تكن جميلة .. "))♥
كرتي البعبع"
يمكن عشان الناس من منظوري غير من منظور غيري :)
يمكن عشان لما باتعامل مع حد بيبقى لازم ابص في عنيه و أنا فعليا مش شايفاها, بس شايفة "نفسه"
يمكن عشان و انا باتكلم مع حد على اي حاجة لازم أكون متوجهة ليه بالكلام, و ممكن نشتغل يوم طويل عريض و اول ما اسيبه تسألني كان لابس ايه قولك ماعرفش!
باشوف اللي جوه مش اللي برة, اللي برة دي تفاصيل مع الزمن بقت تتخزن في عقلي اللاواعي و بيترجمها لانطباعات, و بعدها خلاص
يعني من أول مرة -على الأغلب- طريقة اللبس و اسلوب الكلام و تعبيرات الوش, شوية حاجات كدة بتترجم لانطباعات و معاني و تصنيفات بالفطرة, و بعدها بابدأ أشوف ال "روح"
و ما أعقدها النفس البشرية رغم بساطتها : )
الروح هي اللي باشوفها بوضوح شديد, و كل ما دونها بيبقى صفر على الشمال, لما باحب روح بيبقى عشان شوفت منها فعلا جمال, و لما ابقى عايزة أطلع ده في كلام او موقف ماباعرفش! لإن ببساطة هي بتبقى في لمحة خاطفة كدة, كلمة بانطباع معين في وقت معين اديتني أثر معين و مع رؤية الروح دي فبتدي المعنى عندي :)
فيه أرواح من جمالها بابقى عايزها احضنها أوي و اوقولهم قد ايه هما جُمال و انا باحبهم عشان جمالهم الداخلي ده و جوهرهم النقي :))
طبعا مش كل الناس ينفع نقولها كدة D: فيه ناس -حتى لو من كوكبك- هتبصلك بصات الكائن الفضائي الغير مفهوم, و بالتالي الحل بيبقى الدعاء على الأغلب أو كلمة شكر
و انا باكتب افتكرت أكتر من موقف خلوني آخد بالي إني فعلا ماباشوفش الناس رغم إن ممكن اشوفهم في اليوم الواحد بالساعات و تقريبا كل يوم, و كل موقف كان عبارة عن ان حد يقولي على فلان أو فلانة تعليق على مظهر و أحيانا طريقة كلامهم, و انا اقولهم لا يا جماعة ازاي! أكيد لأ و بتاع, و ابقى مستغرباهم أوي, بس اقول لنفسي لما اشوف فلان أو فلانة هابقى آخد بالي من التعليق ده, و نص المرات -ده لو مش أغلبها- بانسى بردو, و لما باركز بالاقي الناس كان عندها حق و بدأت أشك في حاسة البصر عندي D:
و عشان طبعا التعليقات باسمعها من البنات فبيبقى أغلبها على سكان الكوكب الآخر, و باكتشف العجب! المشكلة إن لما باعرف حاجة معينة و تثبت في دماغي بتفضل معلقة معايا, بابقى مش عارفة اتعامل فعلا لإن طول ما انا شايفة اللي برة باحس بعدم مصداقية بطريقة ما..
مرة تعليق "هو فلان بيشرب سجاير؟ -
لأ ليه؟
غريبة أصل مش عارفة لون سنانة غامقة!"
انا مش فاكرة من اللي قالي بس كان نفسي ساعتها اقول "لون سنانه!!! انتي بجد؟"
المشكلة الكبرى هي في "غض البصر" سواء ولد و لا بنت
الولاد عشان موضوع اني اركز مع حد في عينه و انا باتكلم ده تعب السنين, و عشان ماباعرفش فابص في اي مكان تاني, من ناحية نص الكلام بيطير و ماباركزش, و من ناحية باحس ان اللي قدامي هيفتكرني غير مهتمة أو منصتة لكلامه
مش بقى اكتفي بهذا القدر, لأ تيجي مرة بنت صاحبتي ربنا يسامحها تتكلم على حد بطيبة نية و تقولي
"بس فلان ما شاء الله عينيه لونها مش عارفة ايه
مين ده؟
فلان (المفروض ان حد أعرفه كويس يعني)
بجد والله؟
أيوة يا بنتي ده حتى باين يعني من لون شعره اللي كذا
مين ده؟ "فلان" أكيد يعني؟ بنتكلم على نفس الشخص؟
أيوة !! ده واضح جدا!
جايز!"
و بعد صدمتي في نفسي ان اكيد لازم اغير النضارة, عندي مشكلة في التعامل مع هذا الفلان حتى هذه اللحظة
و من بعد شوية مواقف قريبة قررت أوقف تعامل من الولاد من ناحية, و من قعدات البنات اللي بتطب عليا من ناحية تانية, لإن فعلا اكتشفت ان موضوع الملاحظة ده مابيبقاش ليه علاقة بشكل البنت و لا مدى تدينها أو على الأقل اللي بيبقى ظاهرلي يعني
--
نسيت أقول إني اساسا مش من كوكب البنات ده ... انا بس جيت غلط و في حالة بحث عن موطني الأصلي
--
البنات بقى دول حبايبي أيوة الله, خوفي كله بيرتكز لما اتكلم مع بنت لبسها فاقع مرارتي و لا مكياجها يكفي حي بحاله و لا كلامها مش ولا بد, بيبقى مشكلتي "يارب ماغتبهاش في سري" و لا حتى بنظرة, الواحد بيشوف حاجات غريبة, و لإني بأُحتسَب على الكوكب ده, فالحديث بيبقى من منطلق "حدث ولا حرج" .. و لما أتوجد في قاعدة من اياهم بتاعة آخر موضة و آخر أغنية و آخر فنان و مين عمل و مين سوّى .. تقريبا بعد مدة زمنية لا تتجاوز ال 10 دقايق بافصل فصلان تام و اقعد اتأمل البنات دي, سواء صحاب و لا قرايب و لا أغراب, و فعلا مشكلتي اني ما احكمش عليهم بظن سوء من غير قصد, و لا اني حتى افتكر كلامهم بعد ما امشي, و لا افتكر انطباعات اللي بتتكون لا ارادي عنهم بعد كدة
بس في كل العتمة دي (ايوة هي شيء عاتم غير اخلاقي تفصيلا و موضوعا), بالاقي ناس زيي من نفس الكوكب تايهين برد كدة و لسة بيدوروا على كواكبهم ^_^ الناس دي لما باتكلم معاها (باسمع طبعا الأول عشان باخاف ابدا يتقال عليا مجنونة, فباستنى اكتشف الأول) باحس إن يــــــــــــاه يا عبد الصمد D: كنتوا فين من زمان!
أيوة لسة فيه ناس بتشوف الروح و جمالها :) بتشوف الجمال في التفاصيل البسيطة أووووي, بتشوفها في كلمة شكر, بتشوفها في بسمة روح, بتشوفها و هي جوه جوه أوووي و بتنسى أو تتناسى اللي برة :)
--------
في خاطرة سريعة, كل الناس بتتجوز؟ أغلبها؟ طيب هو كل الناس جميلة؟ طيب ايه معايير الجمال؟ مش هي بردو بتختلف من حد للتاني؟ طيب ازاي كل الناس دي بتتجوز؟ و بتحب؟
أصلهم بيحبوا الجمال :) و الجمال اللي ذكره رسول الله (صلى الله عليه وسلم) لما قال على حد من الصحابه إنه "جميل" و سألوه "كيف؟" قال لهم إنه جمال خُلُقه :)
(Y) .. :)
ReplyDelete