حاسة إني عمري قصير
رغم إن سني صغير
بس أنا مش شايفاه كدة
محدش قادر يحس بيا ليه :'(
شايفة غيري العاجز بيعمل
و أنا بصحتي عاجزة إني أعمل
حاجة تفيد غيري بجد
تخدم بلدي, تعلم بنت تعلم ولد
فكري و فكر جيلي غير
حلمنا هو واقع نجيبه و نطير
مش مجرد حلم
يتحول هم
و نلوم الدنيا و نقول أصل و فصل و في يوم نندم
و ندور في روتين و ندني و ننحني للأرض
و نقول مصير مش تقصير و نسلم و الحلم خلاص انقرض
و قسوة الدنيا و الغدر يغزونا كالمرض
لأ مش هسلم للواقع, أصل أنا كدة
جيلي كدة, فكرنا و تركيبنا كدة
و عشان كدة ثورنا على التلاتين سنة
عشان فكرنا و حلمنا برة الشبابيك اترسم و بروحنا اتبنى
لو هعيش عشان أثبت إني أقدر, هثبته و لو بعد سنين
لو هحارب عشان تفهموا إننا بنهدر, من عمرنا سنين
هعيش و هحارب و هثبت إني صح, إني أقدر, إني أقوى من الدنيا, من مشكلات خلقها غيري, يتكعبل فيها الخسرانين
و أنا هكتم ألمي جوه ضلوعي, مش هتسمعوا منه الأنين
هحارب بهدف و لهدف مش ههدر جهودي, بس افتكروا عشان هتسمعوا عني بعدين
و تسألوا و تتحسروا
هو جاب القوة دي منين؟
هي كانت زيينا؟ مننا؟ عاشت وسطنا؟ لا دي تلاقيها مش من هنا, و جاية تبني عندنا
أقول لكم؟ .. و لا بلاش, كدة كدة هتعرفوا بعدين!
No comments:
Post a Comment