فتحت الراديو و أنا في المطبخ عشان مازهقش .. فـأعدت أقلّب, المهم رسيت على نجوم FM كانت إعلانات .. و شوية و لقيتني واقفة في موقف شعبي!!
كان برنامج على الموقف و كل الأغاني (الشعبي) اللي قلبك يحبها ... لوز لوز لوز!!
الطبيعي إني أقفل, أو أقلب على الأقل .. بس أنا أعدت أفكر ..
هو بجد فيه كدة؟ في ناس (فعلا) بتسمع الكلام ده بالمعاني دي بالأسلوب ده؟
هو بجد في ناس (بتستمتع) بالأغاني دي زي ما واحد بيحب يسمع عمرو دياب مثلا و لا منير و لا فيروز!! (( مــثـــلا؟! ))
طيب و هي الناس دي اللي هي أنهي طبقة من الشعب؟ إنت فاكر إنهم السواقين و المكوجية و الناس اللي في أماكن شعبية بس؟
طيب ماشي أنا هقول إنهم دول (بس)..
مش دول تقريبا كدة اللي هم الناس اللي تحت خط ثقافي و مالي معين؟ آه دول الناس اللي باين كدة بيمثلوا أكتر من نص الشعب؟
الشعب اللي حضرتك منه .. آه هو .. لأ مش الناس بتوع الكاميرا الـ Professional و النظارة الـ Ray-ban و الأماكن الـ High Class و الكلمتين الإنجليزي دول ...
ده دول الناس اللي (بالكاد) عايشين (بيخدموا سعادتك) مقابل إنهم يلاقوا كام قرش يعيشهم هم و ولادهم ..
دول الناس اللي ثقافتهم و (عـيــشتهم) و أسلوب حياتهم هي مسؤوليـة حضرتك يا مثقف يا سياسي يا فنان يا أديب يا رجل الأعمال يا خريج الجامعات الأجنبية يا (طالب العلم).
مسؤوليتي و مسؤوليتك إن المستوى العام أصبح (كدة) و نزل الأرض و بِعِد عن الدين و ماشي في عكس إتجاه التحضر و الرقي.
يـــاه قد إيه إحنا مقصرين في حق ناس كتير أوي...
و طول ما احنا عايشيين في دنيا لوحدنا و ناسيين أو (مُتناسيين) إن في ناس عايشة كدة, و طول ما احنا واخدين جانب و مستوانا (قال) ما يسمحش إننا نتعامل معاهم و ننزل لـ (مستواهم) ((اللي هي مسؤوليتنا أصلا إن حصلت الفجوة البشعة دي! )) عشان نِفهَمهم و نعلمهم و نقضي على الجهل و نزود الوعي و (ننهض) بالبلد ((فعلا)) ..
طول ما هيبقى فيه كلمة إسمها (شعبي) بتحمل كل ما هو دون المستوى ... بدلا من حمل الوصف الحقيقي للشعب
و طول ما هيبقى فيه مواقف و شرايط و كلام جوز اللوز!
** مع الإعتذار للـ (مكسرات)..
No comments:
Post a Comment