*36* ماتسَربَعونيش

كنت في بيت واحدة صاحبتي لما مامتها علقت على العباية و قالت لي..

"بس إنتِ كدة حددتِ نوع العريس اللي هيتقدم لك..."

كان نفسي أقولها "آه والله يا طنط عندك حق" !!

بس للأسف, لقيتني برُد رد تاني خالص..

لإن للأسف ده مش الواقع..

للأسف (تاني) دلوقتي الولد الملتزم و اللي مش ملتزم عايز واحدة ملتزمة

و للأسف (برده) مش كل واحدة لابسة عباية, ملتزمة

و مش كل واحدة ملتزمة, لابسة عباية! 

و بالمثل لقيتني بقول.. 

"ما باقاش كل واحد ملتزم, شكله ملتزم

و لا كل واحد شكله ملتزم, فعلا ملتزم" !

لما قعدت أدورها في دماغي كدة, لقيتني  افتكرت الأستاذ اللمبي في جملته الشهيرة .. "إنت مين ياض؟!"

إيه يا جدعان اللخبطة دي! هي الدنيا ملعبكة كدة ليه؟ مع إن الأمور أبسط من كدة والله!

المشكلة و اللخبطة و الحاجات اللي الـ "مفروضة" تكون (بديهياً يعني), و ماباقيتش "مفروضة" (فعليا), سببها إحنا..

من كتر ما كسرنا القواعد, ما باقاش فيه قواعد نستند ليها (عمليا), و مع كسر كل قاعدة الأمور بتزيد تعقيد!

و الناس بدل ما كانت بسيطة و أمورها بسيطة, و البيت كان يبان من عنوانه, لأ دلوقتي لازم دراسة لولبية لعلم النفس, اللي هو في حد ذاته بيتكلكع كل مآده مع تكلكع الشخصية العصرية, و أصبح دراسة الشخصيات من الأساسيات قبل أي خطوة لأي عتبة بيت!

مش بس في الجواز, لأ دي بقت أساسيات عشان تفهم اللي بيشتغلوا معاك, و جيرانك و صحابك, حتى أهلك في البيت, تبدأ تقرأ و تطبق عليهم اللي قرأته و تشوف بقى هم من أي نوعية من الناس! أهلك اللي هم عايشين معاك 24 ساعة وشك في وشهم دول, آه عارفهم؟

--> اللي مابيقتنعش بالحاجات دي (دراسات علم النفس), هقوله: معلش! طبق إختبار "الأنيكرام" = "The Enneagram" على أهلك و إنت هتعرف إنك بالكاد تعرفهم!

--> أما بقى اللي بيحب علم النفس و بيآمن بدراسته, هيبقى عارف فعلا إن العيلة في البيت الواحد "دلوقتي" ماتعرفش بعضها, و لازم دراسات عليا.. قصدي.. علم نفسية..!

 --  و هرد أقوله: ماتعرفهمش؟ آآه فعلا, إنت ماباقيتش بتشوفهم أصلا, صحيح هتعرفهم منين؟! 

بس ما هو ده برده بسبب العصر المكلكع اللي احنا ابتدعناه, و اللي بقى "متسربع" أو كما أوصفه "عصر السربعة" مش "السرعة"! 

و (السربعة) أعزائي, هي المشكلة اللي إتوصلت لها و قررت أعالجها على المستوى الشخصي, و فعلا لما حاولت لقيت الأمور بقت أحسن كتيـــر (على المستوى الشخصي برده)

و ده بقى اللي هاحكي لكم عنه المرة الجاية إن شاء الله :D