*85* من خَلَق خالق الخَلْق؟ .. دعوة للتَفَكُّر

يبدو العنوان لبعض الناس (القليلة) مألوف بعض الشيء و حديثه مُكرر

وللبعض يعتقد فيه دعوة للـ "إلحاد" 

و البعض سينكر علي ما أكتب 

و البعض لن يكلف نفسه القراءة حتى (يا عم فكك)

و لكني أنشد هؤلاء الـ "بعض" الذين يكلفون أنفسهم عناء التفكُّر

فإليكم مني دعوة للتفكُّر .. و لوضع أنفسنا و لو لقليل من الوقت في مكان من سلك طريق الإلحاد!

و هنا أقصد بالإلحاد التفكُّر النابع من حقيقة البحث عن الحقيقة ليس إلا

و هو في الأصل ليس إلا طريقا ربانيا يعرفه المسلمون من القرآن أن التدبر و التفكر في الكون و الوجود ما هو إلا هدي رباني في طريق البحث عن الحقيقة و "الحق"

--

سأكتب أفكاري المتناثرة عبر بضع سنين قليلة لي على هذا الكوكب.. في دعوة نفسي للتفكُّر الحر

فاعذروني فيما سأكتب لأن هذه أفكار نفسي الداخلية فلا تؤاخذوني عليها, إنما إن أخطأت فصوبوا لي عسى تعم المنفعة

--

(باكلم نفسي كأني شخص بيقنع شخص .. و ده حالي عموما مش بس في الموضوع ده)

طيب أنا هاكتب عن شيء شاغل عقلي من صغري, و اليومين دول بدأ يلعب بدماغي تاني كتير و هو "الإلحاد"

الفكرة هي مش الإلحاد كـ ظاهرة و لكن كـفكر. من و أنا صغيرة كنت بافكّر هو لو كل حاجة ليها أصل و لها "واجد" طيب مين أو "إيه" وجد ربنا؟

مرة تشاركت مع صاحبتي الأفكار ولقينا إننا بنفكر في نفس الحاجة .. ده كان تقريبا في 4 إبتدائي لما تشاركنا الفكرة, كان مشاركتنا نابعة من إننا حاسين إننا أغراب و بنفكر في حاجات غريبة.

بعدها بفترة طويلة جدا (شوية سنين كتير كدة) على إذاعة القرآن الكريم سمعتهم وهم بيقولوا الأسئلة اللي بتيجي على أذهان الأطفال و إزاي نتعامل معاها يعني .. لما جم للسؤال ده كان الرد "استعيذ بالله من الشيطان الرجيم, لإن ده فكر من الشيطان" .. حسيت لوهلة "إنتوا بجد يعني؟" .. طيب انت اديتني حل إزاي أبعد الفكرة عني لوهلة بسيطة عشان خايف على الناس البسطاء فكريا من الكٌفر و ده بسبب التخاذل الدعوي من المسلمين للمسلمين .. أو يمكن عشان كنا في العصر الفاشي السابق فالناس أصلا كانت بتنسى الدين و الطبقة اللي تحت خط الفقر أساسا مايعرفوش عن الدين غير المصطلح إلا من رحم ربي و ده بفضل الفقر و الفساد ... إلخ

فضل الموضوع مؤرقني فترة, مش عشان اهتزاز العقيدة (لإن العقيدة عندي بنيتها من و أنا صغيرة على أسس المعجزات العلمية في القرآن و بنيت عليها بقى كل حاجة, فلما أتزعزع أفتكر المعجزات العلمية و الخطاب العقلي في القرآن فارجع ابعد الأفكار الغريبة من دماغي) لكن لشغف معرفة إجابة منطقية, أو رد تفكيري تحليلي, و اللي للأسف حتى يومنا هذا ماسمعتوش من شيخ أو حتى بني آدم عادي.. لغاية ما قررت أشتري كتاب "حوار مع صديقي المُلحد" لد. مصطفى محمود

بصراحة أنا كنت جايبة الكتاب لسبب تاني, و هو بصفة عامة تناول المآخذ على الإسلام و الأسئلة و الشبهات و الرد عليها لغير المسلمين. بس في البداية لقيت تناول للموضوع المؤرقني ده .. و لخصه في مثال مش فكره نصه بالظبط و لكن كان بمعنى

لو حطينا نفسنا مكان العرايس اللي بنحركها بصوابعنا في مسرح العرايس (زي بتاعة الليلة الكبيرة), و تخيلنا إنهم بيفكروا و كدة فينا لإننا اللي صنعناهم, أكيد أول سؤال هيسألوه "هو إزاي البني آدمين مافيش خيط حد بيحركهم منه زي ما احنا في خيط بيحركنا؟" 

بمعنى آخر, إزاي اللي صنع الحاجة مش زي المصنوع؟ و ده طبعا لضيق تفكير المصنوع!  

إنعكاس على سؤال البني آدمين: هو مين خلق ربنا؟ ما هو إحنا اتخلقنا و كل حاجة في حياتنا ليها أصل, يبقى إيه أو مين اللي خلق اللي خلقنا؟ 

دي كانت بالنسبة لي زي اللي لقى لقية! الراجل ده بيفكر أهو و زي الفل! أمال مافيش حد طلع قالنا الكلمتين دول ليه أو حاجة زيهم قبل كدة؟!! 

--

حاجة تانية سمعتها و أنا باحضر ورشة عمل بتتكلم عن الشبهات و الأسئلة اللي بيوجهها غير المسلمين للمسلمين في تشكيك أو بحث عن الحقيقة, و هدف الورشة كان الإلمام بأغلب المواضيع الجدلية و فين هو الرد الصحيح عليها سواء من القرآن و السنة أو من حيث "المنطق" .. اللي سمعته كان مفهوم(أسلوب) متعارف عليه في الكليات العلمية 

وهو "مفهوم المخالفة" و اللي بيعتمد على عكس الشيء للوصول إما لإثباته أو نفيه

استخدمه مفكر غربي كالآتي:

- الخالق لا وجود له

- إذا فأنا أفكر

- إذا فأنا "موجود"

- و بم أنني لم أوجد نفسي

- فحتما هناك من أوجدني

- إذا فهناك خالق (واجد) لي (أنا الموجود)

 --

(باكلم نفسي بردو)

طيب أنا ليه باكتب الحاجات دي دلوقتي؟ هي بقالها فترة فعلا شاغلة نفسي .. يعني تيجي تقولي "ما وراء الخالق؟" فأقوم ردة عليها بالمعجزات العلمية اللي يليها الكمال في الدين و السنة فتقوم قافلها بقها و تبعد عني .. و بعدين تيجي تاني

الحوار الداخلي كله مابياخدش ثواني .. بس متكرر معايا كتير .. عشان كدة قررت أدعي نفسي للتأمل تاني و ده اللي طلعت به المرة دي:

أنا دايما باحط نفسي مكان اللي قدامي خصوصا لو اختلافنا ديني و فكري زي مسلم و مسيحي أو مسلم و ملحد أو مصري و مش مصري .. عشان ساعتها مش باعرف انسى اننا مختلفين لإنه بيكون حاجة ظاهريا واضحة بعكس الناس اللي زيي خارجيا و فكر عام بس بانسى إنهم مختلفين عني بردو و كتير للأسف مابحطتش نفسي مكانهم إلا في أوقات الذهن الصافي مع نفسي

المهم, فمن شوية كان وقت من الأوقات اللي حطيت نفسي مكان المتشكك في حقيقة الخالق, أو بيرفضها و بيتبع نظرية "داروين" و نظرية ال evolution اللي معتمدة حقيقة إننا اتوجدنا (أي كوكب الأرض و ما عليه من حياة) بالصدفة, لما مش عارفة انفجار ايه حصل في الكون الخارجي أسفر عنه كل اللي على الأرض و ما حولها من فضاء

النظرية نفسها سمعتها أكتر من مرة بس مش متعمقة في تفاصيلها علميا عشان من طبيعتي ماباعرفش حد ياخدني في "دوكة" و يجيب من الآخر, لازم براحة كدة "أفصص" الدنيا من الأساس, ففكرت:

لو الملحد بيعتقد إن "الكون" انفجر بالصدفة .. يعني إذا الإنفجار ده هو "الأصل" اللي مافيش حاجة قبله

و مش هاسأل و أقول مين اللي خلق الشيء اللي اتفجر و لا ايه اللي سبب تفجره عشان كدة هنوصل لدوامة إن كل حاجة وراها حد أو حاجة مسببة و مش هننتهي .. فنسلم إن تفكيرنا تعب من التفكير .. فققرنا نقف عند الإنفجار و نقول إنه الأصل

الحلو في الموضوع بقى, إن ليه مانقولش إن إحنا كمان كـ مسلمين يعني اتبعنا نفس الفكر؟

احنا سألنا أسئلة مين وجد الشمس و مين وجد القمر و مين وجد "الوجود" .. و بعدين قلنا خلاص اللي وجدنا هو "حد" أو "حاجة" غير جنس البشر أطلقنا عليه "إله" .. طيب هم ليه مش آلهة؟ .. هنقول يمكن يكونوا آلهة! بس اللي خلقة الكورة الأرضية و كل اللي عليها و كل اللي بتؤثر فيه و بيتأثر بيها من الفضاء الخارجة هو "واحد" .. لإن بالبلدي كدة "ريسين على مركب تغرق" و بالتالي مع النظام الدقيق جدا اللي ماحصلش في يوم انه اختل موازينه للأرض و اللي عليها و اللي بيتأثر بيها .. فوصلنا إن اللي خلق كل ده هو "واحد"

طيب هل فيه آلهة تانية خلقت أماكن و حاجات تانية إحنا ماتوصلناش ليها؟

جايز!

بس إيه بقى اللي حصل .. اللي حصل إن "إله" الأرض بعتلنا احنا أهل الأرض على مر الأزمنة رسايل في شكل "كتب" و "أوراق" عن طريق بني آدمين مننا أسماهم الإله "بالرسل" عشان بيوصل رسالة أو "نبي" عشان بيوصل نبأ معين, أو بني آدمين تانيين اجتمع فيهم توصيل الرسايل و الأنباء.

عرفنا منين إنهم مش بيفتوا؟ و لا بيكدبوا؟ من المعجزات العلمية اللي ميزهم الخالق بيها و ده بيوضح قد إيه الخالق عايزنا مانتبعش أي حد يقول أي حاجة ولكن "نعرفه بالعقل" اللي خلقه لنا

"المعجزات" هي أشياء يعجز البني آدم عن فعلها و عن كيفية فعلها حتى, لكن لا يعجز عن فهمها و إدراكها

و بم إن الإنسان عاجز عنها, يبقى اللي صنعه و أوجده هو اللي أوجدها, ولا إيه؟

طيب من هنا بقى بدانا نعرف حقايق و توجيهات و هنا الخالق قالنا في رسايل القرآن إنه

 (هو الأول و الآخر و الظاهر و الباطن و هو بكل شيء عليم)!

إيه ده! مش ده السؤال اللي بدأنا بيه التفكير في كل ده؟! ده "الخالق" جاوبنا عليه! ده مش بس كدة لكن كمان من أسمائه المستخرجة من رسايل القرآن إنه هو "الواجد" ! يعني مفيش حد وجده .. يعني هو مش "موجود", يعني هو مش "مفعول به" لكن هو "الفاعل" هو "الواجد"

و في المرحلة دي من مراحل التفكير, قررت أكتب اللي وصلت ليه, لعل و عسى يكون السؤال اللي كان بيؤرقني يكون بيؤرق حد تاني مش لاقي له تسلسل منطقي فياحبذا يلاقيه هنا في دعوتي للتفكر :)

أخيرا كدة اللي فاضلي, إني أقرأ الرسايل و أتدبرها, لعل الخالق يمن علي بتدبر سليم و حكمة لآياته زي ما مَن علي بمحاولة التفكير بشكل منطقي 

الحمد لله . ربنا فعلا عرفوه بالعقل :)

*84* اعرفي مِحرِمِك و عَلِّمي عليه :)

المحرم, وجمعها محارم, و هم الرجال من أهل المرأة المحرمين عليها في الزواج

بمعنى آخر, هم الرجال الذين يحل على المرأة أن تكون حرة في المظهر أمامهم 

و لأن المحارم غانين عن التعرفيف و قد ذكروا في القرآن, فأنا لن أتطرق لذكرهم, ولكن من خلال بعض النقاط الإستيضاحية سأذكر بعض ما ألهته عنا الدنيا وسط كم الإلهاءات الغير معدود .. و بالبلدي كدة هاقول إن.. 

- ابن جارتي الصغير مش مِحرِم .. عشان يجي يسلم ويبوس

- ابن عمي و ابن خالي اللي أصغر مني مش مِحرِم .. عشان يدخل البيت و بابا مش موجود

- ابن صاحبة ماما اللي متربي معانا من واحنا في اللفة مش مِحرِم .. عشان نتعامل زي "الإخوات"

- ابن البواب مش مِحرِم, و المكوجي و بتاع السوبر ماركت اللي بيوصلك الطلبات مش مِحرِم .. عشان أفتح لهم الباب بلبس ماينفعش حد في الشارع يشوفني بيه .. ولا أكون متساهلة في حجابي

- الولاد اللي بيشتغلوا معانا في الـ "أكتيفيتيز" و الإتحاد مهما كان فيه فرق سنين بيننا, فهم بردو مش مِحرِم ..
- و اللي في الشغل مديرة عليهم و قد ولادك, بردو مش مِحرِم .. عشان .. كل اللي بيحصل بقى (غاني عن التعريف) =)

- اللي قرأ فاتحة عليكِ مش مِحرِم .. عشان تبقوا مع بعض في الرايحة والجاية

- و اللي بردو خطبك لسة مش مِحرِم .. عشان الخروجات والـ .. بلاش أكمل بردو عشان الليلة معروفة =)
__

من الآخر, "كلهم سواء" من الجانب الديني مهما كان سِنّك أو سِنّه

__

(فَذكِّر إِن نَفعتِ الذِّكرى سيذَّكَّرُ مَن يَخشَى)

(وذَكِّر فإنَّ الذِّكرى تَنفَعُ المُؤْمِنين)
--

رب اغفر وارحم وتجاوز عما تعلم

*83* الدبلة في اليمين ولا الشمال؟

هو ليه دبلة الجواز (اللي يُفترض بيه أبدي) بتبقى في الـ "شمال" ؟

رغم إن استخدام الإيد اليمين هي المُحببة سواء في الفعل قصير الأجل أو طويل الأجل.

يعني مثلا أفعال طويلة الأجل "نسبية" زي الأكل و الشرب بتبقى بالإيد اليمين

وأفعال قصيرة الأجل زي الشهادة في تشهد الصلاة بيبقى بالإصبع في الإيد اليمين, و لما بتيجي تلبس شراب مثلا ولا جزمة مُحبب تبدأ باليمين
ولما بنيجي ندبح بيبقى بالإيد باليمين و لما بندخل البيت بيكون بالرجل اليمين

ده غير إن اليمين مُحبب بشكل عام زي النوم على الجنب اليمين و غيرها أمثلها كتير متعارفة بيننا

فهل على هذا النهج قرروا إن البداية (الخطوبة) هي اليمين؟ رغم إن الإرتباط الفعلي (اللي هو الفعل الأساسي طويل الأجل) هو الجواز؟

#خواطر ملهاش علاقة بأي حاجة

*82* النور مكانه في القلوب :)

افرح :)

ابتسم :)

اضحك :)

احضن حضن كبير حتى لو في خيالك :)

غمض عنيك و افتكر أجمل مكان زُرته :) ابتسم, و قل الحمد لله وحده :)

غمض عنيك تاني وافتكر أجمل مكان نفسك تزوره :) ابتسم, وادعي ربنا تزوره في الدنيا ويكن لك مثله في الفردوس :)

اسعِد .. تُسعَد :)

افرِح .. تَفرح :)

عيش لك, و للناس .. عشان ربنا :) .. عيش ليهم لله :) .. عيش ليهم بالله :) عيش ليهم وتوكل على الله :)

واحتسب الأجر :)

"النور مكانه في القلوب" :)

        

*81* خلف الأقنعة

خلف الأقنعة, يَخفى الكثير وتبقى الروح .. كما هي على سجيتها المُطلقة, بلا قيود, بلا مجاملات زائفة, بلا تجميل و تشويه للطبيعة الربانية

خلف الأقنعة, يزول كل ما هو زائف, وتبقى الحقائق مجردة تجريد عجيب, حتى أننا أنفسنا لا نعرفها .. خلف الأقنعة

خلف الأقنعة, مساحة للتأمل, للتدبر, للتمعُن, ومتعة الإكتشاف

خلف الأقنعة, حيث رؤية الغير مرئي, وسمع الغير مسموع, و الشعور بللا محسوس, ووجود الغير موجود

خلف الأقنعة, عقول متعايشة مع كل ما هو غير فزيائي

خلف الأقنعة .. 

لنا نفحات لم تُستكشف بعد
 

لنا أمكنة لم تُستدرك بعد

لنا كلمات لم تُهمس بعد

لنا خيال لم يُمس بعد

.

.

.

وهكذا نعيش في اللا عيش

خلف الأقنعة