بحب الوقت ده من اليوم في الوقت ده من السنة .. عشان زي دلوقتي من 16 سنة كنت بالعب في الشارع مع جيراننا, مصريين و أجانب بيدرسوا في الأزهر
زي الوقت ده من اليوم في الوقت ده من السنة كنا بناخد العَجل ونجري بيه في البلوك بتاعنا ولما نخلص نتجمع تحت بيت حد فينا و نلعب استغماية و صلّح
و ساعات نجمع البنات و ننزل لعبتنا الشهيرة "المطبخ" و العرايس في بير السلم أو الجنينة .. و نقطف ورق الشجر و نعمله ملوخية D=
و لما كنت بادخل محل عمي و أطرده منه و أنا عندي 4 سنين, و أقف قال يعني ببيع D= ده أنا كنت باعمل عمايل! الله يرحمك يا عمي =)
أحلى حاجة في شارعنا إنه بيوت عائلات .. باليل زمان كان جيراننا يتجمعوا تحت بيتنا وأستغلسهم كدة .. أصل كلهم كبار .. أتاري أنا اللي كنت صغيرة D=
اللي مضايقني إن دلوقتي الجيران ماباقوش زي زمان, و جيلي كل واحد في مكان, ده لو عرفنا بعض, اللي عزل و اللي بقى في حاله ماعدا صحبة زماان أوي
مابنتجمعش غير لو حد فينا عنده فرح و لا عزاء .. و الله حاجة تحزن .. لو ماكانش اللجان الشعبية اتعملت كنا زماننا زي ما احنا بل و أسوأ ..
آخر حاجة بحبها في الوقت ده من اليوم في الوقت ده من السنة .. إني كنت باقعد مع جدي و جدتي في البلكونة يحكولي تاريخ شارعنا و جيراننا
مع كباية شاي العصرية .. و الجو جميل و الشمس ماباقيتش حامية.. :) ياااه بيبقى أحلى وقت :)
إزاي كنت هانسى! السكر المكعبات .. كنت أسيب جدتي في البلكونة و أتسحب أسِّف العلبة, كانت علب عتيقة كبيرة كدة .. بس كنت باعشقه D=
أيام لا تُنسى... :)
